भारतीय गीत चोरी गर्ने संगीतकार.. (भिडियो सहित)

काठमाडौं, २२ माघ । ‘पद्यमिनी’ नामक नेपाली चलचित्रका संगीतकार चेतन सापकोटाले भारतीय चलचित्र ‘बोलबच्चन’को गीत जस्ताको त्यस्तै कपी गरेर नेपाली संस्करण बनाएका छन् ।

‘दिल तोडेर नजाउ..’ बोलको गीतको शब्द पनि आफै लेखेका चेतनले केटाको स्वर स्वयंले नै दिएका छन् । केटीको स्वर भने संगीता प्रधानले दिएकी हुन् । प्रधान पनि भारतीय गायिका हुन् । ‘बोलबच्चन’मा ‘चलाओ ना नैनो से..’ भन्ने बोलको गीत छ ।

मौलिक गीतसंगीतलाई संरक्षण सम्बद्र्धन गर्नुपर्ने अवाज उठेका समयमा चेतनले त्यसलाई वेवास्ता गरिदिएका छन् । यस अघि पनि विभिन्न नेपाली चलचित्रमा भारतीय चलचित्रको कपी गरेर चर्चा र विवादमा आएका चेतनले चेतेका छैनन् । चेतनले ‘भगवान’ चलचित्रमा पनि एउटा भारतीय चलचित्रको गीत कपी गरेका थिए ।

उनकै कारण ‘पद्यमिनी’ चलचित्र धरापमा पर्ने खतरा बढेको निर्माण पक्षले गुनासो गरेको छ । गीतका बारेमा चलचित्रका निर्माता बसन्तकुमार श्रेष्ठले भारतीय चलचित्र ‘बोलबच्चन’को गीतसँग मेलखानु संयोग मात्रै रहेको बताए । ‘गीत चोरी गरेका हैनौ,’ उनले भने, ‘यस अघि पनि चेतनजीले मैले बनाएको ‘भगवान’ चलचित्रमा एउटा भारतीय चलचित्रको उतार्नु भएको थियो ।’ हाल मकवानपुरमा जारी सत्तारुढ एमाओवादीको सातौं राष्ट्रिय एकता माहाधिवेशनमा प्रतिनिधि बनेर सहभागी चेतनसँग यस विषयमा कुराकानी गर्न भने सकिएन ।

मोबाइल फोन बन्द रहे पछि चेतनसँग सम्पर्क हुन नसकेको हो ।गीतको छायाँकन पनि सोही भारतीय गीतकै आधारमा गरिएको छ । संगीतकार सापकोटाका गीतहरुमा आफ्नै मौलिकता नहुँने बरु भारतीय चलचित्रका गीतहरुको स्पष्ट प्रभाव देखिने गरेको चलचित्र पत्रकारहरुको पनि टिप्पणी छ । सैार्य दैनिकबाट