National News » कोसीमा डुंगा दुर्घटनामा हराएका १५ जनाको पहिचान खुल्यो

---

कोसीमा डुंगा पल्टिएर बेपत्ता भएका १५ जनाको पहिचान खुलेको छ। बेपत्ताको खोजीमा नेपाल प्रहरी र सशस्त्र प्रहरी गरी एक सय १४ जना तथा स्थानीयवासी सक्रिय भए पनि फेला पर्न सकेका छैनन्।



सुनसरीको चतराघाटबाट उदयपुरको रामपुर ठोक्सिला जाँदै गरेको डुंगा दुर्घटना सोमबार कोसीकिनारमा पल्टिँदा दुई महिलाको मृत्यु भएको थियो। मृतक सुनसरी महेन्द्रनगरकी चन्द्रकुमारी राई र उदयपुर रामपुर ठोक्सिलाकी पार्वती खड्काको शव परिवारलाई जिम्मा लगाइएको सुनसरीका प्रहरी उपरीक्षक गणेश थापाले बताए।

बेपत्ता हुनेमा उदयपुर मैनामैनी-९ का टेकबहादुर राई, ठोक्सिला-३ की कोपिला बिष्ट, रामपुर ठोक्सिला-२ का तहतसिंह राई, सुनसरी कालाबन्जारका अर्जुन थापा, ठोक्सिलाकी मुना खड्का, भोजपुर दुमान्नाका प्रेम श्रेष्ठ, रामपुर ठोक्सिला-४ का प्रशान्त विक, बगलाका नारायण श्रेष्ठ, गाईघाटकी राधिका चापागाईं, दिनेश चापागाईं, उदयपुरकी सपना मगर, नारायण श्रेष्ठ, ठोक्सिलाकी रोशिका खड्का, जुमान राई र प्रभुमाया राई छन्। कति जना डुंगामा यात्रु सवार थिए भन्नेसमेत यकिन तथ्यांक छैन। क्षमताभन्दा बढी यात्रु डुंगामा चढाइएको र ओर्लने क्रममा यात्रुले हतार गर्दा असन्तुलन भई पल्टेको प्रहरीको भनाई छ।

बेपत्ताको खोजी तथा उद्धारका लागि पूर्व क्षेत्रीय सशस्त्र प्रहरी पकलीको टोली तथा नेपाल प्रहरीको टोली परिचालन गरिएको प्रमुख जिल्ला अधिकारी लक्ष्मण थापाले बताए। सशस्त्र प्रहरीको टोलीले डुंगामार्फत खोजी कार्य जारी राखेको छ। कोसी टप्पु वन्यजन्तु आरक्षले पनि मोटरबोट प्रयोग गरी बेपत्ताको खोजी गरिरहेको उदयपुरका प्रहरी उपरीक्षक अजय भट्टराईले बताए।