रोनाल्डोले रियल मड्रिडबाटै सन्यास लिने !

२५ असार, काठमाडौं । स्टार फुटबलर क्रिष्टियानो रोनाल्डोले रियल मड्रिडबाटै फुटबलबाट सन्यास लिने दावी क्लबका अध्यक्ष फ्लोरिन्टिनो पेरेजले गरेका छन् । २८ वर्षीय पोर्चुगली फवार्ड म्यानचेष्टर युनाइटेड फर्कने तथा फ्रान्सेली क्लब मोनाको जाने चर्चा पनि चलिरहेको छ ।

स्पेनिस क्लबका अध्यक्ष पेरेजले भनेका छन्–‘तपाई निश्चित हुनुस कि क्रिष्टियानो रोनाल्डोले रियल मड्रिडबाटै सन्यास लिनेछन् ।’ उनले अघि भनेका छन्–‘रोनाल्डो रियल मड्रिडबाटै सन्यास लिन चाहन्छन् र हामी पनि । जिनेदान जिदान र अन्य महान खेलाडीहरु जस्तै ।’

रियलले नयाँ सम्झौता गर्न गरेको प्रस्ताव रोनाल्डोले अस्वीकार गरेपछि उनले स्पेन छाड्ने चर्चा चलेको थियो ।

लगतै म्यानचेष्टर युनाइटेडले आफ्ना पूर्व स्टारलाई ओल्ड ट्राफडमा भित्र्याउन प्रयास सुरु गरेको थियो । तर, हालै मात्र उनले आफू रियलमा खुसी रहेको बताएका छन् ।

२००३ देखि ०९ सम्म म्यानचेष्टर युनाइटेडबाट प्रिमियर लिग खेलेका रोनाल्डो त्यसपछि स्पेनिस जाइन्ट रियल मड्रिड गएका हुन् ।