बुटवल, वैशाख २- भैरहवा क्षेत्रका दुई स्थानमा भएका सवारी दुर्घटनामा परी आज दुईजनाको मृत्यु भएको छ। लुम्बिनीबाट भैरहवा आउँदै गरेको लु ५ प ९४८० नम्बरको मोटरसाइकल लुम्बिनी रोडमा रिक्सामा ठोक्किँदा मोटरसाइकल चालक ४० वर्षीय धकधईका उमाशङ्कर रौनियारको ज्यान गएको जिल्ला प्रहरी कार्यालय रुपन्देहीले जनाएको छ।



स्टेशनरी व्यवसायी समेत रहेका रौनियारको मृत्युप्रति दुःख व्यक्त गर्दै नेपाल पुस्तक तथा स्टेशनरी व्यवसायी महासङ्घ जिल्ला शाखा रुपन्देहीले आज जिल्लाका सबै स्टेशनरी पसलहरु बन्द गरेको थियो।



त्यस्तै रुपनदेहीको मणिग्रामबाट भैरहवातर्फ जाँदै गरेको लु ११ प ५४८९ नम्बरको मोटरसाइकललाई सोही दिशाबाट जाँदै गरेको बा १ झ ६७७७ नम्बरको माइक्रो भ्यानले ठक्कर दिँदा मोटरसाइकल चालक आनन्दवन-५, प्रेमनगरका २५ वर्षीय कृष्ण खरेलको मृत्यु भएको छ।



दुर्घटनामा माइक्रो भ्यान पल्टिएकाले भ्यानका चालक तनहुँका शङ्कर अधिकारीसहित अन्य आठजना घाइते भएका छन्। उनीहरूको मेडिकल कलेज भैरहवामा उपचार भइरहेको जिल्ला प्रहरी कार्यालय रुपन्देहीले जनाएको छ। रासस