दैलेख नारायण नगरपालिका ६ नमुना बस्तीका कमारो सार्कीको छाप्रो केही दिनदेखि सुनसान छ । श्रीमती चावलीको शरीरमा अगुल्टो झोसिदिएपछि उनलाई प्रहरीले नियन्त्रणमा लियो । चावली जिल्ला अस्पतालको बेडमा थलिएकी छन् । यता, उनीहरूका तीन नाबालक सन्तान सहाराविहीन छन् । घटनायता उनीहरू भोकभोकै छन् । बजारमा ५-१० रुपैयाँ मागेर भोक मेटाउने गरेका अबोध बालबालिका साँझ अँध्यारो अनुहार लिएर छाप्रोमा पुग्छन् । रित्तो छाप्रोमा बाबुआमा भेटिनु त परै जाओस् चुल्होमा आगोसम्म बल्दैन ।

१० वषर्ीय जेठो छोरा कालु, ८ वषर्ीया छोरी पुष्पा र ५ वषर्ीय कान्छो छोरा टुनटुनलाई खाना दिनेसमेत बस्तीमा कोही छैन । बिहानैदेखि लालाबालासहित बस्तीका सबै सदस्य मजदुरीमा व्यस्त हुने हुँदा बिचल्लीमा परेका बालबालिकालाई सहारा दिने कोही छैन । नमुना बस्तीका सर्वजित वादीले अस्थायी प्रयोगका लागि दिएको जग्गामा सार्की परिवारको टहरो छ । कमारोले दिनभर मजदुरी गरेर कमाएको पैसाबाट परिवार पाल्दै आएका थिए । 'तीन बच्चा छन्, हाम्रै खाना पकाउने र खाने समय नै निश्चित छैन,' छिमेकी सर्वजितले भने, 'उनीहरू कता जान्छन्, केके खान्छन्, थाहै हुँदैन ।' नमुना बस्ती वादी समुदाय सुकुम्बासी बस्ती हो । अति विपन्न भएकाले सार्की परिवारका बालबालिकाले अहिलेसम्म स्कुलको ढोका देख्न पाएका छैनन् ।

सामान्य विवादमा मदिराले मातेका कमारोले शुक्रबार राति पत्नी चावलीको गुप्तांगलाई केन्दि्रत गरी अगुल्टो झोसिदिएका थिए । चावली र छोराछोरीले गुहार मागेपछि छिमेकीले खरानी हुनबाट बचाए । अगुल्टोले उनको योनीको केही भाग, पुट्ठा र तिघ्रा जलेको छ । प्रहरीले शनिबार कमारोलाई नियन्त्रणमा लिई हिरासतमा राखेको छ । उनले अगुल्टो झोसेको प्रहरीसमक्ष स्विकारेका छन् । प्रमुख जिल्ला अधिकारी एवं जिल्ला बालकल्याण समिति संयोजक उमेशकुमार ढकालले बालगृह नहुँदा उद्धारमा कठिनाइ भएको बताए । 'जिल्ला बाल कल्याण अधिकारीको संयोजनमा बैठक बसाली उद्धारमा आवश्यक सहयोग गर्न निर्देशन दिएको छु,' उनले भने, 'प्रशासनमा यसका लागि बेग्लै कोष हुँदैन ।'