National News » ज्ञानेन्द्रलाई सोफा, नेतालाई प्लाष्टिकको कुर्सी ! जसले गोल हाने पनि पूर्वराजाको ताली

---

४ फागुन, काठमाण्डौं । चौथो सिमरा गोल्डकपअन्तरगत हिमालयन शेर्पा क्लब र संकटा क्लबवीचको फुटबल हेर्न मैदानमा पुगेका पूर्वराजा ज्ञानेन्द्रको मन पर्ने टिम कुन थियो होला ? पूर्वराजासँगै मञ्चमा बसेका अतिथिहरुका अनुसार पूर्वराजाले न हिमालयन शेर्पा क्लवको पक्ष लिए, न त संकटाकै । बरु उनले जसले गोल हाने पनि ताली बजाए ।

बिहीबार खेल शुरु भएको ५ मिनेटपछि नीलो ज्याकेट, कालो पाइन्ट र कालै चश्मा लगाएर खुसुक्क देख मैदानमा पुगेका शाहले शुरुमा दुबै टिमले एक-एक गोल गर्दा दुईचोटी ने ताली बजाएका थिए । खेल बराबरीमा टुंगिएकाले पुन आधा घण्टा थपिएको समयमा पनि उनले पूरै समय लगाएर खेल हेरे । पछिल्लोपट शेर्पा क्लबले थप गोल गर्दा पनि उनले ताली ठोकेका थिए ।

खेल मैदानभन्दा करिब १ किलोमीटरको दुरीमा नातेदार प्रभुसमशेर राणाको घरमा बस्दै आएका ज्ञानेन्द्र खेल शुरुभएको पाँच मिनेटपछि अनौपचारिक पोशाकमा खेल हेर्न आएकाले छेउछाउका बाहेक अन्य धेरै दर्शकहरुले पूर्वराजाबारे पत्तै पाएनन् । मञ्चमा रहेका पूर्वसभासद्द्वय शोभाकर पराजुली र जयराम दहालले समेत आफ्नो छेउमा पूर्वराजा आएर बस्ने बेलामा मात्रै आयोजकबाट जानकारी पाएका थिए । खेल हेरुन्जेल पूर्वराजा कसैसँग चुइँक्क बोलेनन् । छेउमा उनका सहयोगी पनि थिएनन् । उनको बगलमै रहेको शोभा खाली थियो । पूर्वराजालाई शोभामा राखिएको थियो भने पूर्वसभासदलगायतका अन्य अतिथि प्लाष्टिकको कुर्सीमा बसेका थिए ।

पूर्वराजा खेल हेर्न शोफामा बस्नै लाग्दा कांग्रेस नेता शोभाकुर पराजुलीले नमस्कार गरेका थिए । तर एमाओवादी पूर्वसभासद् दहालले भने नमस्कार गरेनन् । शाहले खेल हेरेर फर्केपछि सिमराका राजनीतिक नेता कार्यकर्तावीच यो विषयले चर्चा पाएको छ ।

खेल शुरु हुनै लाग्दा पूर्वसभासद् बसेका ठाउँमा शोफा मिलाउनुका साथै टेबलको पनि सजावट गरेको देखेपछि पूर्व सभासद् दाहालले आयोजकमध्येका कासिम मियाँलाई सोधे- के हो, पूर्व सभासद् बसेका ठाउँमा अर्को को अतिथि आउन लाग्यो ? कते पूर्व राजा पनि आउने भए कि क्याहो ?’ मियाले दहाललाई कुनामा लगेर खुसुक्क भने- ‘हो, पूर्वराजा ज्ञानेन्द्र आउने रे ।’

गणतान्त्रिक गोल्डकप
पूर्वराजा ज्ञानेन्द्रले हेरेको सिमरा गोल्डकपको नाम शुरुमा ‘राष्ट्रपति गोल्ड कप’ राखिएको थियो । पछि यसको नाम परिवर्तन गरेर ‘सिमरा गोल्ड कप’ बनाइएको हो । शुरुको वष विभागीय मन्त्रीका हिसाबले यसको उद्घाटन माओवादी नेता देव गुरुङ्गले गरेका थिए । दोस्रो गोल्डकपको उद्घाटन कांग्रेस सभापति सुशील कोइरालाले गरेका थिए भने समापन एमाओवादी अध्यक्ष प्रचण्डले गरेका थिए । गतसाल सम्पन्न तेस्रो सिमरा गोल्डकपको उद्घाटन प्रधानमनत्री डा. बाबुराम भट्टराईले गरेका थिए ।

चौथो गोल्डकपको उद्घाटन प्रायोजक म्याजिक मोमेन्टका प्रमुख श्रीहर समशेर राणाले गरेका हुन् । सिमरा गोल्डकपको उत्थानका लागि एमाओवादी र कांग्रेसमा पूर्वसभासद् शोभाकर पराजुली र एमाओवादीका जयराम दहालले पनि भूमिका खेल्दै आएको स्रोत बताउँछ । शनिबार हुने फाइनल खेल हर्न तथा समापनका लागि काठमाडौंबाट एन्फाका अध्यक्ष गणेश थापा सिमरा जाने कार्यक्रम छ । ज्ञानेन्द्रलाई अतिथिका रुपमा आसन ग्रहण गराइए आफूहरुले नमान्ने गणतन्त्रवादी नेताहरुले बताएका छन् ।

पूर्वसभासद्को प्रतिक्रिया
‘भोलि फाइनल हेर्न पूर्वराजा ज्ञानेन्द्र आए भने मचाहिँ बस्दिँन, हिँड्छु ।’ -पूर्वसभासद् एवं कांग्रेस नेता शोभाकर पराजुलीले अनलाइनखबरसँग भने । एमाओवादीका पूर्वसभासद् दहालले भने नागरिक भैसकेका व्यक्तिले फुटबल हेर्दा आपत्ति जनाउन नहुने बताए । ‘उनलाई अतिथि बनाइयो भनेचाँहि हाम्रो आपत्ति हुन्छ, तर नागरिकसरह फुटबल हेर्न किन नपाउने ?’-दहालले भने- ‘ज्ञानेन्द्रले राष्ट्रपतिको चुनाबमा भाग लिँदा त हामीले रोक्न मिल्दैन भने त्यसरी फुटबल हेर्नु उनको अधिकारको कुरा हो ।, यसलाई स्वाभाविकरुपमा लिनुपर्छ ।’

चन्दा दिने एउटा नाम कमाउने पूर्वराजा
बारामा चइरहेको चौथो सिमरा गोल्डकपमा नाम नखुलेको व्यक्तिले १० लाख चन्दा दिएको चर्चा चलेपछि उक्त सहयोग ज्ञानेन्द्रबाटै भएको चर्चा चलेको छ । तर, अनलाइनखबरलाई प्राप्त जानकारी अनुसार उक्त रकम ज्ञानेन्द्र, पारस वा कोमलले नभएर सिमराकै एक स्थानीयवासीले दिएका हुन् । ‘सिमरावासीलाई माया गर्ने एक व्यवसायीले उक्त चन्दा दिएका हुन् । तर, नाम प्रचार गर्दा पार्टीहरुले चन्दा मागेर हैरान पार्ने भएकाले नाम सार्वजनिक गर्ने नमानेका हुन् ।’ सिमरा गोल्डकपको स्थापनामा भूमिका खेलेका एक व्यक्तिले अनलाइनखबरसँग भने- ‘१० लाख दिने ज्ञानेन्द्र होइनन् ।’